原創音樂大獎比賽已經22年，個人觀察，有一个現象愈來愈明顯，過去來參加比賽的，大部分是猶未入行，甚至嘛無一定想欲入行，只是因為佮意音樂，對創作有興趣，想欲寫歌種種原因所以來參加比賽，不而過經過二十偌冬漸漸起變化，如今來的，真濟已經是長期有咧演出，有家己的舞台，甚至已經出道的朋友。
這屆又閣參加台語組的評審工作，聽完131首參賽的作品，我發現佇語言的部分有一年一年進步，包括愈來愈濟參賽者開始用端的的台文創作，台語發音咬字的錯誤，佮直接用中文翻台文的語法嘛攏有減少，相信這是過去這十數冬來，本土語言推廣的成績，雖然離理想猶有真長的路，總是一步兩步攏是進步。
進前第20屆頒獎了後，我有寫一篇予參賽者参考的感想佮建議，回頭閣去讀一遍，大部分的內容猶原符合這次參賽的朋友，檢采有興趣，連結我貼佇回覆，會當徙去参考看覓，下面補充一寡這改的想法，希望對有興趣寫歌的朋友加減有幫助：
＊
本屆前三名，若毋是已經出道框過金，無著各種比賽著過名，舞台經驗豐富，其中第二名佮最佳現場演出是仝人，其實有幾落首歌，佇複審的時陣，分數真懸大家攏真看好，偏偏去到舞台頂，可能是舞台經驗無夠，可能是緊張，表現了無蓋好，實在真可惜，這嘛再次證明，現此時的音樂比賽，已經毋但是歌曲創作的分數，包括舞台演出攏真重要，一首歌欲感動人，面面角角攏袂當重耽。
＊
欲共有入圍最後無著等的朋友鼓勵一下，會當對百偌首歌抾出來，已經是足無簡單，若是因為上台演出無垢熟手，我的建議是：下回你歌寫好，毋管敢有參加比賽就開始排練，設想你踮舞台頂，欲按怎詮釋你的作品，另外，原創音樂大獎毋是干單鼓勵培養舞台頂的歌手，幕後的創作者嘛是真重要，若是感覺家己無適合上台表演，你嘛會當揣一个適合的人代替你上台，像我就是一个無才調上台唱歌的創作者，顛倒予我更加專心踮幕後創作。
＊
關於親情的歌，有一寡心情想欲閣講一擺，親情的歌其實真歹寫，尤其是寫予已經過往的親人，有真濟是愈寫愈個人，別人無一定會當進體會，嘛有一種是沓沓滴滴愈寫愈幼，翻做華語就是「流水帳」，這兩種攏是較無感覺的作品，另外一種，有可能文筆真好，但是進入故事的情景內底會發現，明明親人猶閣佇咧，是按怎你歌詞內底所寫的話，你的心情，哪會攏無親喙向你的序大人講過，這就真奇怪，若講是友情或者愛情，無當面去解釋，有可能是有苦衷，家己的親人，你寫甲這深情，又閣毋願意當面去表達，我會懷疑這款感情是假的，是為著寫歌才編造的，作詞人編故事無問題，你會當用講古說書的人稱去處理，總講一句，親情人人攏會當寫，與寫甲予人感動，文筆需要設計，流行歌會當寫家己，但是愛寫出受眾共同的感情。
＊
愛情歌閣較危險，愛了解歌詞是「一面之詞」，你欲對話的對象，並無講話的機會，你佇歌內無論按怎罵，按怎詈，按怎怨嘆，按怎後悔，攏是你家己講的，無人會共你黜臭，若是兩个人已經扯，互相無底代，猶閣講會過，若是你有想欲挽回，歌詞內底閣講白賊抑是有所掩崁，只要一句予人看破跤手，人聽完一定走甲離褲跤，尤其看著台語無夠好閣硬欲用台語告白，運氣好，離離落落是小可好笑，若運氣歹，看起來就爬代爬代，莫講無感動，連誠懇都攏感覺袂著。
＊
母語原創音樂大獎每年舉辦，是以語言分，原民語，客語，台語三組，愛會記，語言是第一要項，這次有幾偌首歌，音樂真好，旋律真好，包括歌聲嘛真好，毋過台語真正是無夠好，檢采你有真好的音樂天分，但是母語的能力不足，建議你先去上課將母語學好，無就是直接去創作你專長的語言，出路一定比寫你無熟手的語言較緊較好，別種語言我毋知，市面上有真濟台語半桶師寫的台語歌，因為歌手因為宣傳因為各種原因有紅，所以日後，歌內底錯誤的發音，錯誤的用詞，錯誤的變調，就一直流傳散佈，這是真危險的代誌。
＊
這屆有一个囝仔兄才14歲，可能是年歲的關係，故事的深度較一般，但是各方面的表現，台語的用詞發音，舞台頂的演唱、態度，包括佮主持人用台語對談反應攏真扭掠，伊的作品得到佳作，是值得繼續觀察的明日之星，另外，第二名，佮另外一首佳作，攏是用真歡樂的舞台演出，佮女性角度出發，對貧惰閣荏懶的男性，佮超速啦採花蜂的抗議，取材新鮮特別，猶閣有幾落首歌，可能是主題傷過市場，內容較芭樂，甚至旋律有親像市面上某一首歌，複選的時陣就àu-tsuh，毋過實在真好聽，甚至有評審認為予某一个歌手演唱一定會紅，這就牽涉到比賽的規則，咱是「原創」音樂大獎，你的作品攏是一寡火燒豬頭皮的內容，並無符合主題，但是大家攏相信，你一定有法度寫出閣較媠閣較有特色的歌。
＊
最後呼籲鄉親序大，咱厝內若是有子弟佮意音樂，有咧創作，請平常時盡量佮伊講台語，若是有寫出作品，嘛盡量先聽看覓，看文法用詞發音種種有什麼重耽無，AI的時代，寫歌愈來愈簡單，不而過語言的能力，毋是逐口灶攏講會輾轉，有學有保庇，有講有行氣，語言比人較好，分數當然比人較懸，大家加油。
沒有留言:
張貼留言